Concellos ourensáns e lusos estreitan lazos

Representantes institucionais dun lado e doutro da fronteira participaron onte no Seminario transfronteirizo sobre a Agrupación Europea de Cooperación Territorial (AECT) Raia Seca Gerês-Xurés, celebrado no Centro Cultural Marcos Valcárcel, e no que se presentaron os resultados deste proxecto europeo. O seu obxectivo é mellorar a eficiencia das administracións públicas, promovendo a cooperación xurídica e administrativa nas rexións fronteirizas.

As administracións locais presentes acordaron promover a intensificación das dinámicas transfronteirizas xa existentes, a través da creación dunha AECT que facilite a xestión do “ben común” e promova o desenvolvemento deste territorio transfronteirizo de forma colaborativa e harmoniosa. Ademais crearase a Reserva da Biosfera Transfronteiriza Gerês-Xurés.

13 concellos ourensáns

Os concellos ourensáns que formarán parte desta futura AECT son Baltar, Bande, Calvos de Randín, Cualedro, Entrimo, Lobeira, Lobios, Monterrei, Muíños, Oímbra, Padrenda, Verea e Quintela do Leirado. O norte de Portugal estará representado por Arcos de Valdevez, Melgaço, Montalegre, Ponte da Barca e Terras de Bouro.

Este proxecto europeo, promovido pola Deputación e o Inorde, está cofinanciado ao 75% polo FEDER a través do Programa Interreg.