La Diputación colaborará para recuperar una zona de Manila

A Deputación de Ourense foi elixida pola Axencia Española de Cooperación Internacional para o Desenvolvemento para participar nun proxecto internacional que ten como obxectivo a recuperación de "Intramuros", o distrito amurallado máis antigo de Manila, capital de Filipinas, construída polos españois no século XVI.

A arquitecta da Deputación de Ourense Eva Reza, especialista en Urbanismo, foi a técnica designada para formar parte da comisión solicitada pola administración de Intramuros para estudar e planificar a mellor estratexia de recuperación deste ámbito.

Segundo a técnica, esta comisión levará a cabo traballos de avaliación do grao de deterioración da cidade vella, planificará actuacións de rehabilitación e de mellora da mobilidade e buscará un espazo urbano de calidade que permita tamén a promoción da actividade económica.

A Deputación de Ourense atribúe esta colaboración ao papel que desenvolve a institución provincial na "defensa e protección da conservación do patrimonio cultural" ourensano, unido á propia "traxectoria profesional" de Eva Reza.

O pasado mes de xaneiro, a comisión para o proxecto "Intramuros" reuniuse en Manila para analizar sobre o terreo o grao de degradación da cidade vella e definir a estratexia de intervención para a rehabilitación integral deste contorno urbanístico.