Dous equipos ourensáns, premiados en Galiciencia

Galiciencia viviu onte a súa segunda xornada coa final do desafío científico “Atrévete coa mente!”. Un evento no que o talento ourensano destacou sobre os máis de 1.000 rapaces que participaron no evento, facéndose con premios en dúas das categorías. Entre os alumnos de primaria, foi o equipo “Jimar”, integrado por Marín Gil, Jimena Martínez e Ana Fernández, o que conseguiu o galardón; mentres que na categoría de primeiro a terceiro de Secundaria foi “Red Cajal”, composto por Julia Villar, Juan Andrés Fernández e Santiago González. Ambos equipos, do colexio ourensán Santo Ángel.

Xogos e talleres

No marco da feira, os máis pequenos continúan participando en xogos destinados a sensibilizar á mocidade sobre a saúde mental, nunha liña marcada pola temática desta edición -”Neurociencia e saúde mental”- na que se celebran os vinte anos da maior feira científica da comunidade. Talleres que afondan no funcionamento do cerebro para aprender a coidalo; espectáculos nos que os estudantes poden achegarse ao atractivo da ciencia; e concursos que serven como entretemento educativo. Todas elas, actividades que enchen de ilusión aos máis pequenos nunha iniciativa que pechará hoxe as súas portas ata o ano que ven.