Primeira xornada de Galiciencia, con enfoque social

A primeira xornada de Galiciencia deu onte o pistoletazo de saída entre gominolas terapéuticas, auga de choiva para xerar electricidade e unha solución intelixente que mellora a seguridade no transporte público. Todos eles, proxectos científicos elaborados polos máis de 115 equipos que optan ao gran premio que se entregará nos vindeiros días.

Alumnado de todas as partes de Galicia, así como de Cataluña, País Vasco, Andalucía ou Canarias, achegáronse á maior feira científica celebrada na comunidade para compartir as súas ideas. Os rapaces sorprenderon con propostas de impacto social, como o desenvolvemento de xogos para persoas con enfermidades neurodexenerativas ou para o tratamento do déficit de atención; e con proxectos vinculados ao medio ambiente e a sostibilidade, como un invernadoiro que recolle a auga do orballo ou un sistema de prevención de inundacións, no arranque dunha feira que, ata o venres, seguirá espallando ciencia e innovación entre os máis pequenos.