Felipe Ferreiro: “Pagamos alugueres, luz, educación para nenos… Ata facemos rehabilitacións de vivendas”

O director do comité provincial da Cruz Vermella en Ourense, Felipe Ferreiro, leva no cargo oito anos. Renovou o seu posto recentemente e, na última reunión, os directivos e coordinadores de toda a provincia aprobaron o balance económico do ano pasado. Sobre o período actual, asegura que a demanda de servizos da ONG aumentan debido a crise dos prezos. Xurdiron novas axudas para cubrir as facturas da luz e os alugueiros na cidade, tamén para os refuxiados da guerra de Ucraína.

Creceron as necesidades sociais en 2023?

Si, nos últimos meses e no último ano, notamos un lixeiro incremento sobre todo pola crise dos prezos. Encareceuse moitísimo todo. Temos refuxiados de varios países, a cesta da compra xa sabemos como está... Hai que axudar e tivemos un incremento, lixeiro, pero aumentou a demanda.

Cal é a situación da cidade?

Observamos que hai maior necesidade na provincia en xeral, pero é maior na cidade. Encontramos que hai xente con traballo, pero é precario e dificilmente poden cubrir pagar alugueiros, consumos e a alimentación, sobre todo cando hai nenos. Xa non é unicamente a xente no paro, incluso ós que gañan algo élles bastante complicado chegar a fin de mes.

¿Cales son os servizos que máis prestades?

Damos axudas de todo tipo, pagamos alugueiros, recibos de luz, educación para os nenos, atención a persoas maiores… Ata facemos rehabilitacións de vivendas, de illamento ou acondicionamento da parte eléctrica. Ás familias que están en situación moi delicada lles substituímos as neveiras ou a calefacción, a ventilación… Son moitos aspectos os que cubrimos.

Que prezo tiñan os alugueiros que cubristes?

Puntualmente, pagamos algún de 400 ou 500 euros, depende de cada familia e as situacións. Neste inverno houbo que axudar coa enerxía, pagamos facturas, pero tamén leña para xente que non tiña posibilidades para prender a lareira.

Os estranxeiros acoden ós programas de formación?

Si, atendemos a xente de Venezuela, Perú ou Colombia nos programas de emprego, pero tamén a refuxiados da guerra de Ucraína. É unha situación moi particular.

En que sentido é particular a situación derivada da guerra ucraína?

Desgraciadamente pensabamos que o conflito ía durar menos e estamos xestionando fogares, axudando a nais e fillos e formando a mozos e mozas en idade de traballar para que poidan ter un emprego en condicións.