Máis de 500 millóns de euros en infraestruturas viarias e vivenda en Galicia

O orzamento da Consellería de Vivenda e Planificación de Infraestruturas supera por primeira vez na súa historia os 500 millóns de euros, pasando dos 476 do ano 2024 aos máis de 513 das contas do vindeiro ano 2025.

Tamén aumenta o investimento previsto no Instituto Galego de Vivenda e Solo (IGVS), que contará con máis de 221 millóns, 55 máis. Trátase dunha cifra nunca acadada polo IGVS.

As contas autonómicas do 2025 destinarán 100 millóns de euros para a construción de novas vivendas públicas, 20 millóns para a xestión de novos solos residenciais e 7 para o programa Rexurbe de rehabilitación de inmobles adquiridos en cascos históricos e que permiten engadir novas vivendas ao parque residencial para destinalas ao alugueiro accesible.

Vivenda

O Goberno galego, nos 6 meses desta lexislatura, xa ten arredor de 1.500 vivendas públicas en diferentes fases de execución. A Xunta está avanzando, polo tanto, no seu compromiso de duplicar nesta lexislatura a vivenda pública ata acadar as 8.000 e desenvolver solo para 20.000 vivendas protexidas e 5.000 vivendas libres.

Así, por exemplo, na cidade de Vigo están previstas 1.600 vivendas protexidas no barrio de Navia, distribuídas en tres polígonos, e das que 656 están xa en marcha.

Ademais, a administración autonómica tamén investiu 24 millóns na adquisición de solo. Na cidade da Coruña, concretamente no barrio de Xuxán, o Goberno galego ten xa construídas ou en marcha 144 vivendas de promoción pública.

En Ourense atópase en fase de contratación a construción de 64 vivendas de promoción pública

En Ferrol, está recente a contratación da redacción de proxecto para 75 vivendas de promoción pública, ás que se suman outras 178 vivendas protexidas que se construirán neste barrio.

En Ourense atópase en fase de contratación a construción de 64 vivendas de promoción pública en Cambedo de Raia, ás que se destinará un investimento de 13,17 millóns.

En Santiago, a Xunta ten en execución tres grupos de vivendas en Lamas de Abade e no Castiñeiriño. Estanse construíndo 24 vivendas no Castiñeiriño e 24+12 en Lamas de Abade. Ademais, como medida pioneira, en Santiago, na avenida de Xoán XXIII, construirase o primeiro edificio de arredor de 70 aloxamentos compartidos en alugueiro accesible, destinado á mozos e mozas menores de 36 anos.

En Pontevedra, a Xunta está executando 74 vivendas de promoción pública en Valdecorvos, e ten en fase de contratación outras 104.

En Lugo, a Xunta contempla máis de 12 millóns para a construción de vivenda pública nesta cidade en 2025 e neste vindeiro ano licitarase o concurso de ideas para a Tinería e continuarase a desenvolver este ámbito con novas actuacións, a través do programa Rexurbe investiranse máis de 1,8 millóns de euros.

Viais

Cabe destacar que a Axencia Galega de Infraestruturas disporá o próximo exercicio dunha dotación orzamentaria que suma máis de 265 millóns.

Estas cifras farán posible continuar avanzando na vertebración do territorio, coa continuación de vías de altas prestacións estratéxicas na comunidade. Exemplos destacados son a VAC Tui-A Guarda para a que a Xunta reserva 9 millóns para o vindeiro ano, o que permitirá seguir avanzando ata poder completar a infraestrutura. A vía de altas prestacións Nadela-Sarria, tamén recibirá o pulo da Xunta para avanzar no segundo e último tramo comprendido entre A Pobra de San Xiao e Nadela.

A seguridade viaria tamén está blindada con partidas que ascenden a 68 millóns de euros

Tamén no caso da autovía A Estrada-Santiago (AG-59), A Xunta continúa avanzando na execución a prolongación desde A Ramallosa a Pontevea e, en paralelo, progresa o proxecto para a segunda fase, ente Pontevea e O Rollo, actuación ás que se destinarán neste vindeiro ano 23,3 millóns.

A seguridade viaria tamén está blindada con partidas o próximo exercicio que ascenden a 68M€. Continuarán, polo tanto, as obras de reforzos de firmes ou as actuacións de conservación para manter a rede viaria autonómica en axeitadas condicións.

Ademais a Consellería proseguirá coa extensión do Plan de sendas de Galicia, a través do que a Xunta xa executou máis de 300 quilómetros de itinerarios peonís e ciclistas nas marxes das vías autonómicas e prevé acometer nesta lexislatura outros 150 quilómetros máis.