O MIT de Ribadavia estrea un espectáculo sobre a inclusión

A Mostra Internacional de Teatro (MIT) de Ribadavia presenta este proximo venres un pioneiro espectáculo arredor da inclusión, que porá en escena o Centro Dramático Galego, creado xunto á produtora Culturactiva como parte das actividades do seu 40º aniversario. A estrea absoluta será este venres 26 de xullo, ás 23:00 horas, no Auditorio Rubén García, dentro da programación, que volve contar co apoio da Xunta.

“Nada se sabe” afonda na liña de traballo inclusivo da compañía pública, en conexión coa futura Lei de cultura inclusiva e accesible e a filosofía da propia MIT, ao levar ao escenario dúas actrices e dous actores con diversidade funcionalque repasan diversas versións da discapacidade no teatro clásico, deténdose nunha adaptación moderna e sinxela de Filoctetes, unha das traxedias gregas de Sófocles, asinada por Manuel Lourenzo. Ignacio García e Fran Rei codirixen esta peza na que contan tamén, a modo de creación colectiva, coas achegas de Francisco Sánchez e do elenco con Carme García Rigau, Rubén Bargiela Sierpes, Corina Alfonso Mañá e Elvis García Torres.

O director da Axencia Galega das Industrias Culturais, Jacobo Sutil, interveu no acto de presentación desta pioneira estrea xunto con César Fernández, alcalde de Ribadavia; Fran Rei, membro de Culturactiva; Corina Alfonso Mañá, unha das intérpretes, e o director artístico do festival, Roberto Pascual. Sutil manifestou que este traballo é unha liña necesaria na estrutura pública de teatro e un camiño de longo percorrido.n