Obituario | Eduardo González Ananín, a Coral De Ruada despide a un antigo membro

Con grande pesar recibimos en De Ruada a triste noticia do pasamento do poeta e excoralista Eduardo González Ananín.

Ananín presumía, con razón, de ter sido membro da Coral De Ruada nos anos cincuenta do pasado século e sempre estivo pendente das nosas actividades, mesmo colaborou na nosa revista nalgunha ocasión. A Coral tributoulle unha cariñosa homenaxe o día 26 de xuño de 2009 durante o concerto dos Amigos da Coral De Ruada celebrado no teatro Principal. Durante o mesmo, o daquela presidente Eladio Quevedo entregoulle un agasallo de recordo, tal como se pode ver na fotografía.

Anos máis tarde, concretamente o 21 de marzo de 2018, a Coral De Ruada sumouse á homenaxe que un grupo de amigos lle tributaron no Liceo de Ourense, co gallo do Día Mundial da Poesía, a os dous veteranos poetas ourensáns Serafín Marqués Gil e Eduardo González Ananín.

Dende De Ruada queremos expresar o noso máis fondo pesar por tan sensible perda á súa dona, Carolina, e ás súas fillas Ángela e Inés, así coma aos demais familiares e amigos. Un coralista máis na xa moi numerosa Coral De Ruada do Alén. Descanse en paz.