Otero Pedrayo volve á cidade no mes de abril

Comeza abril, o mes oteriano por excelencia, e a súa fundación anima a cidadanía a participar nos diversos eventos de celebración da figura do escritor ourensán. "Este ano celebrarémolo do venres 5 ao domingo 7, en Ourense e en Trasalba", sinala Afonso Vázquez-Monxardín, secretario da Fundación Otero Pedrayo.

O evento arrancará o venres cunha inauguración no Liceo, seguido dun roteiro oteriano polo Ourense do escritor. "Iremos da man de Otero Pedrayo en base aos textos que escolmamos do libro que publicamos con Maribel Outeiriño -'Del Orense antiguo y otras colaboraciones, Ramón Otero Pedrayo en La Región, 1958-1960", comenta Monxardín. Tralo paseo, Juan Saco Cid, presidente da fundación; Maribel Outeiriño e Manuel Baltar, presidente da Deputación de Ourense, presentarán o mencionado libro.

Xa o sábado, a festa trasládase ao Pazo de Trasalba, antiga casa de Otero, onde Monxardín presentará a peza do mes do derradeiro manuscrito do escritor. "É un texto que escribiu para a décimo terceira Feira do Viño do Ribeiro o 8 de abril de 1976, dous días antes de morrer", adianta. Ademais, mesa redonda con Clodio González, antropólogo, e Patricia Arias, que falarán sobre a relación entre Antón Fraguas -homenaxeado no Día das Letras Galegas- e Otero Pedrayo. Pola ta, proxección e mesa redonda, ademais dun percorrido pola casa do autor. O domingo, os oterianos voltan á cidade para asistir a unha misa en Santa Eufemia na súa honra, seguido dunha ruta polo cemiterio de San Francisco, a cidade "dos mortos".