O Ourense Film Festival suma forzas cos tres festivais da provincia

O Ourense Film Festival (OUFF) continúa dando pasos de crecemento de cara ao seu 30 aniversario. Logo de mudar de equipo directivo e anunciar a creación dunha residencia audiovisual, entre diversas accións, agora únese aos outros tres festivais de cinema que teñen lugar na provincia -o Ficar Entrimo, o FIC Vía XIV de Verín e o RiR de Allariz- para apoiar de maneira activa a industria cultural en Ourense.

Os catro certames, dos que o OUFF é o máis lonxevo, contan co apoio da Deputación de Ourense, como parte do seu compromiso coa cultura e o talento local. Para a directiva do OUFF, este é só un primeiro paso que se intensificará o vindeiro ano mediante alianzas con outros grandes certames galegos e nacionais. A suma de forzas supón “un novo impulso para o apoio cara outros festivais que tamén están a traballar a reo para levar o cinema a outros lugares e crear sinerxias para que o público que desfruta destes eventos culturais, decidan acudir a outros, o cal nos beneficia a todos os festivais”.

A primeira das citas cinematográficas ourensás é o Festival Internacional de Curtametraxes e Arte de Entrimo, o Ficar, que celebra a súa terceira edición esta fin de semana, do 18 ao 20 de xullo. Ademais das proxeccións das curtas a concurso, o certame acollerá unha exposición de fotografía, monólogos e concertos.

En agosto será a quenda do Festival Internacional de Curtas FIC Vía XIV de Verín, que celebrará o seu décimo aniversario do 29 de agosto ao 6 de setembro. Baixo o lema “A verdade nunca foi tan fráxil”, a cita busca seguir sendo un escaparate referente para a produción galego-portuguesa.

Case ao mesmo tempo, Allariz será o escenario do RiR, o Festival Internacional de Curtas de Comedia, que en 2025 contará a súa edición número 8. Do 30 de agosto ao 6 de setembro, polo RiR pasarán obras de ficción, animación e documentais de distintos países, todas elas co humor como elemento central.

Por último, o 26 de setembro o Ourense Film Festival inaugurará a súa edición número 30, cunha directiva renovada, nova imaxe e o obxectivo de traer o mellor cinema internacional de carácter social á cidade de Ourense. Entre as novidades deste ano, ademais, destacan a celebración dunha residencia audiovisual para mozos creadores, Faíscas, ou a composición dun tema musical propio a cargo de Jose Manuel Cancela.