Peliqueiros, pantallas ou cigarróns enchen Madrid de tradición entroideira ourensá

Non importa o lonxe que se estea de Ourense, sempre é bo momento para presumir con orgullo do Entroido. A escasos días para que o petardazo dea comezo a esta fermosa tradición, os traxes típicos de pantallas, peliqueiros, mázcaras, troteiros e boteiros exhíbense con moito mimo na Casa de Galicia en Madrid, antes de que enchan de cor as rúas da provincia durante as próximas semanas.

A exposición “Entroidos tradicionais. Provincia de Ourense” pon en valor unha das celebracións máis auténticas e representativas da etnografía galega. Fotografías, traxes tradicionais, máscaras e obxectos característicos agrupánse na sala Álvaro Cunqueiro, sendo capaces de teletransportar a calquera ata o epicentro desta festa. Trátase dunha proposta que conta coa colaboración da Deputación de Ourense, co fin de revalorizar e conservar as tradicións do Entroido máis tradicional e tamén un dos máis longos de Europa.

“O Entroido non é só unha tradición, tamén é un motor de dinamización turística”, sinalou o director da Casa de Galicia

Durante a inauguración desta mostra o director da Casa de Galicia en Madrid, Luis E. Ramos, salientou que “o Entroido non é só unha tradición, tamén é un motor de dinamización turística”. Neste senso, resaltou a importancia dos entroidos en Galicia, facendo fincapé no recoñecemento de Xinzo de Limia como ‘Festa de Interés Turístico Internacional’ e de Verín como ‘Festa de Interés Turístico Nacional’. 

O director da representación da Xunta de Galicia animou aos presentes a vivir en primeira persoa o verdadeiro Entroido e agradeceu á Deputación e ao Inorde (Instituto Ourensán de Desenvolvemento Económico) “o esforzo por trasladar ata o corazón de Madrid os elementos máis característicos dos seus entroidos”.

A intención desta exposición é afondar na tradición. É por iso que ademáis dos traxes máis coñecidos como os da ‘Madama e o Galán’ de Cualedro ou o do ‘Boteiro’, tamén se pode desfrutar daqueles menos populares como o do ‘Follateiro’ de Lobios ou o da ‘Bonita, o oso e a vaca’ de Cartelle. Esta proposta estará en Madrid ata o 28 de febreiro de 2025. Seguro que moitos ourensáns que viven na capital non perden a oportunidade de pasar pola Casa de Galicia para sentirse un pouco na casa. Aínda que seguro que a maioría xa teñen os seus billetes para poder estar presentes na provincia durante estas datas tan especiais.