Premian un estudo do Campus que detecta pólipos grazas á IA

A Real Academia Galega de Ciencias (RAGC), coa colaboración da Axencia Galega de Innovación (GAIN), concedeu o premio “Francisco Guitián Follea” ao proxecto “PolyDeep: Sistema intelixente de detección e clasificación en tempo real de lesións colorrectais mediante Deep Learning”. O traballo foi realizado por investigadores da Escola Superior de Enxeñería Informática do Campus de Ourense da UVigo, liderados por Miguel Reboiro e Daniel González, en colaboración co Complexo Hospitalario Universitario de Ourense (CHUO), a Facultade de Ciencias da Universidade da Coruña e o Centro de Investigacións Científicas Avanzadas da UDC.

O equipo galardoado baseouse na Intelixencia Artificial para desenvolver un sistema de apoio que busca mellorar a detección e diagnóstico de pólipos colorrectais en tempo real durante as colonoscopias, redundando non só na mellora do diagnóstico e tratamento do paciente, senón no potencial aforro de custos en forma de reseccións ou biopsias innecesarias. Permite, ademais, a clasificación automática dos pólipos colorrectais, de modo que o modelo avisa ao endoscopista durante a exploración da presenza de pólipos, pero tamén do tipo de pólipo detectado. No marco deste proxecto, os investigadores crearon un amplo banco de imaxes e vídeos de colonoscopias con información histolóxica e de localización de pólipos que está dispoñible para a comunidade científica a través do Biobanco do Instituto de Investigación Sanitaria Galicia Sur.

“Facemos unha valoración moi positiva da concesión deste premio, que recoñece o potencial de transferencia de PolyDeep”, sinalan Miguel Reboiro e Daniel González. Os líderes do proxecto destacan que o seu desenvolvemento foi “un reto” nado dunha primeira reunión entre os grupos “da que saíron moi boas ideas, entre elas a de desenvolver este sistema que en tempo real axudase á detección de pólipos”. A iniciativa, apuntan, desenvolveuse desde 2018 ata 2021 con financiamento da “Convocatoria Retos” da Sociedade do Ministerio de Economía, Industria e Competitividade e “conseguiu chegar a onde quería e ademais ten futuro”. Segundo explican os investigadores, o traballo continúa na actualidade co proxecto PolyDeep Advance, que acadou recentemente financiamento na convocatoria “Probas de Concepto” do Ministerio de Ciencia e Innovación para realizar a validación clínica deste sistema e o plan de acceso ao mercado para a súa comercialización.

Ademais, PolyDeep continúa na liña de traballo de colaboración co CHUO “buscando tarefas ou problemas nos que poidamos aplicar intelixencia artificial e que redunden ou que busquen a mellora no diagnóstico ou tratamento dos pacientes”.

A Academia Galega das Ciencias recoñece outras dúas iniciativas

Por outra banda, tamén dentro dos Premios á Transferencia de Tecnoloxía en Galicia 2022, outorgouse o premio “Fernando Calvet Prats” ao proxecto “Ligandos fluorescentes como alternativa ao uso da radioactividade na industria farmacéutica”, do grupo de Descubrimento e Síntese de Fármacos do Centro de Investigación en Química Biolóxica e Materiais Moleculares (CiQUS) e da facultade de Farmacia da Universidade de Santiago; integrado por Eddy Sotelo, Javier Sardiña, Mabel Louza e José Brea, impulsores da empresa Celtarys Research.

Por último, o premio “Ricardo Bescansa Martínez” foi para a posta en marcha da spin- off “BFlow S.L.”, que naceu en maio de 2020 froito da colaboración entre grupos de investigación das facultades de Óptica e Física da Universidade de Santiago e a Fundación de Investigacións Sanitarias de Santiago (FIDIS), para optimizar o proceso de descubrimento de moléculas e fármacos grazas á aplicación da tecnoloxía microfluídica máis avanzada.