Premian o labor xacobeo de Maribel Outeiriño

A Academia Xacobea reforza a súa nómina de membros ilustres coa incorporación de cinco novos Académicos de Honra, entre eles a xornalista ourensá Maribel Outeiriño, pola súa vinculación co Camiño a través da publicación de dúas guías sobre a Vía da Plata.

“Son cinco persoas de prestixio profesional e formación académica, contaremos con eles na promoción e difusión do Camiño e dos valores que alumearon as peregrinacións a Compostela e que hoxe están presentes na civilización occidental”, valorou o presidente da Academia Xacobea, Xesús Palmou. Xunto a Outeiriño, completan estes novos ingresos Luis Alamancos, Carlos Baliñas, José Ricardo Pardo e Pedro Piñeiro.

O casino de Noia acolleu onte o acto solemne, no que Ulises Bértolo, secretario da Academia Xacobea, foi o encargado de ler as actas de nomeamento dos cinco académicos e repasar os currículos e méritos que atesouran para incorporarse á institución. No caso da ourensá Maribel Outeiriño, valorou “a súa extensa traxectoria de máis de corenta anos no mundo do xornalismo e o seu labor divulgador no ámbito das rutas de peregrinación a Santiago, como integrante desde a súa fundación da Asociación de Amigos da Vía da Plata de Ourense, e como autora de dous guías pioneiras nese ámbito: ‘O Camiño Mozárabe a Santiago’ (1999) e ‘De Sevilla a Santiago polo Camiño Mozárabe’ (2010)”.