O Premio Freire Carril, para Felipe Senén López

A Asociación Cultural Agromadas, de Seixalbo, entregará o Premio Freire Carril ao arqueólogo, escritor, debuxante, pintor e divulgador cultural Felipe Senén López Gómez. Así o acordou o xurado, reunido este mesmo mércores 29 de maio. Dende a asociación especifican que o seu labor de transmisión cultural ten “especial fincapé na cultura e idioma da nosa terra”.

Deste xeito, consideran que os seus traballos fano “merecente deste premio”: “Moitos son os traballos feitos e publicados por este home nado no Carballiño”, explican dende Agromadas. O premio entregarase o vindeiro 29 de xuño na segunda xornada da XVIII edición da Festa dos Foros, tal e como confirma un comunicado asinado por Manuel Herminio Iglesias, presidente da asociación. O a figura de bronce que se lle entregará a Senén é obra do escultor ourensán Xosé Cid.

A Asociación Cultural Agromadas convoca o premio Freire Carril dende 2009. Carece de contía económica e pretende salientar “a aquelas persoas e entidades que traballan polo ben común ou desenvolvendo actividades culturais, sociais… en favor da comunidade social, da cultura en xeral e, en particular, do idioma galego”.