O PSOE da cidade de Ourense pide limpeza, iluminación e seguridade

O grupo municipal do PSOE reclama ao goberno de Gonzalo Pérez Jácome na cidade que tome medidas para mellorar o servizo de limpeza, desbroce, iluminación e servizos básicos nos barrios ante “o aumento de incidencias”. “O goberno local ten un papel crucial xa que o repunte de incidencias está vencellado, en parte, ao estado de abandono e decadencia no que se atopan os nosos barrios”, advertiu a socialista Natalia González.

Tamén solicitan que a xunta de seguridade local aborde a coordinación, vixilancia e actuacións en materia de seguridade nos barrios da Ponte, O Pino e o Vinteún, así como naqueles lugares onde sexa preciso ante o repunte de incidencias. “A chegada do AVE e o notable incremento turístico converteron a Estación Empalme e os seus arredores nun lugar de moito tránsito e de maior actividade delitiva a pequena escala”, advirten.