O PSOE de Ourense urxe dous centros de saúde e a Unidade de ictus

O aspirante á alcaldía de Ourense do PSOE, Paco Rodríguez, presentou onte parte das medidas no ámbito sanitario do programa electoral para as vindeiras eleccións municipais do 28 de maio. Os socialistas esixirán a construción dos centros de saúde de Mariñamansa e O Vinteún. Así o anunciou Rodríguez nun encontro organizado co Ilustre Colexio Oficial de Médicos de Ourense, arroupado por Julio Torrado, voceiro de Sanidade dos socialistas no Parlamento de Galicia; as deputadas Marina Ortega e Carmen Dacosta e o médico e socialista de recoñecida traxectoria Alberto Fidalgo. “O PP e a Xunta prometen moi ben pero cumpren moi mal. Destes dous centros levan falando anos, e nós levamos anos tamén introducindo a enmenda nos orzamentos para que se edifiquen. Sempre votan en contra”, lembrou Torrado sobre o asunto.

O PSOE propón a recuperación da Concellería de Sanidade, así como da Oficina Municipal de Información ao Consumidor. “É un dereito recoñecido pola lexislación autonómica e estatal que as e os ourensáns accedan a orientación neste eido”, critican os socialistas.

Por outra banda, Torrado insiste en que “a administración autonómica está recibindo fondos do Estado para reformar e mellorar centros de saúde, preto de 40 millóns de euros, que son unha oportunidade para Ourense”. Ademais, abordou a necesidade dunha unidade específica de ictus no CHUO.

Nas políticas socialistas ourensáns, Paco Rodríguez anuncia que “iniciaremos o programa Rede Ourense sen Glute con campañas de divulgación sobre este tipo de intolerancia e o deseño dun mapa no que aparezan os restaurantes cunha oferta adaptada”.

Así mesmo, o PSOE asegura que a saúde mental estará “no centro das políticas” que se implementen no caso de acadar o goberno municipal. O deseño dun Protocolo de Prevención e Detección Precoz da Conducta Suicida nos centros educativos, sociosanitarios ou de atención a persoas maiores que dependan da administración local é outra das prioridades.

No acto participou o vicepresidente do Colexio Médico de Ourense, José Luis Jiménez, que sinalou que “hai que promocionar a visita de coidadores e voluntarios para aquelas persoas maiores que viven soas”.