A Real Academia Galega lembra a Pura Vázquez con 67 imaxes

A mestra, poeta e narradora ourensá Pura Vázquez (Ourense, 1918-ídem, 2006) revive na páxina web da Real Academia Galega (RAG). A institución lingüística publicou na súa páxina web unha escolma de 15 das 67 fotografías que conserva da autora debido á proximidade do seu aniversario, xa que naceu o 31 de marzo. “Reflicten as vicisitudes dunha vida marcada pola experiencia da emigración e o compromiso coa literatura”, trasladan dende a RAG.

Na páxina web da Academia seleccionan 15 fotografías, aínda que a totalidade da colección pódese consultar na Galiciana, a biblioteca dixital de Galicia. “A mostra constitúe unha sorte de fotobiografía dunha autora de vida itinerante, entre Galicia, Venezuela e Madrid, que foi quen de manter unha longa e intensa actividade creativa en condicións adversas e de se relacionar estreitamente cos principais círculos intelectuais galeguistas e casteláns do seu tempo”, comentan dende a Academia sobre esta escolma.

Pura Vázquez naceu nunha familia republicana represaliada polo franquismo. Trala guerra civil, rematou Maxisterio en Ourense e exerceu a docencia por diversos puntos do país, como Madrid. En 1955 emigrou a Venezuela, donde permaneceu durante oito anos ata que regresou primeiro a Madrid e logo, en 1992, a Ourense. Cultivou todos os xéneros literarios, malia que destacou en particular pola súa faceta poética. Ademais, publicou artigos en prensa de xeito constante e unha das cabeceiras coas que colaborou é este xornal.