Ritmos ancestrais e moito colorido conquistaron o solpor celanovés coas Xornadas de Folclore

O Claustro Barroco do Mosteiro de San Salvador de Celanova albergou onte o inicio da xira provincial da XXXIX edición das Xornadas de Folclore de Ourense. A cita, que supuxo tamén o pistoletazo de saída ás festas patronais do San Roque que ata o sábado encherán de música e animación as rúas da localidade, contou coa participación das agrupacións de Panamá, Senegal e México.

Veciños e veraneantes da comarca das Terras de Celanova acudiron fieis a súa cita co folclore nun espectáculo que xa é tradición entre grupos de amigos e familias, do cal desfrutan a partes iguais fillos, pais e avós. Tras a benvida por parte do presentador, os 45 integrantes da Academia Andrés Valiente, Danzas y Proyecciones Folklóricas foron os primeiros en subir ao escenario con propostas creativas sen perder esencia das danzas folclóricas do país.

A continuación foi a quenda do ballet Jammu de Senegal quen amosou os ritmos e cores africanos no solpor celanovés. O Ballet Folclórico do Instituto Tecnolóxico de Celaya (México), que neste ano 2024 conmemora o seu 50 aniversario, completou o cartel programado para a vila de San Rosendo amosando un amplo repertorio dos bailes tradicionais mexicanos.

Con cambio de vestuario incluído, os integrantes das tres agrupacións protagonizaron unha segunda quenda de exhibicións evocando a maxia, a historia e a cultura das súas respectivas rexións, aínda que a derradeira actuación dos mexicanos viuse afectada pola choiva obrigando aos asistentes a refuxiarse nos claustros.

A segunda parada a noite foi no Barco de Valdeorras. Ante un entregado público concentrado no paseo do Malecón, as agrupacións Fundación Ballet Folclórico de Nobsa de Colombia, Yuan-Yaun de Taiwán e Huo Srem deSerbia amosaron un colorido espectáculo que converteu a noite barquense nunha rica experiencia de apertura ao mundo e as súas tradicións.

Recepción oficial

As delegacións participantes nestas XXXIX Xornadas de Folclore de Ourense serán recibidas hoxe, ás 12,00 horas, no salón de plenos do Pazo Provincial polo presidente Luis Menor. A Deputación de Ourense, a través do Centro de Cultura Popular Xaquín Lorenzo, organiza este evento que conta coa colaboración da Consellería de Cultura, Lingua e Xuventude e dos diferentes concellos anfitrións.

Pola noite, será a quenda das vilas de Maceda e Verín. O Ballet Folclórico do Instituto Tecnolóxico de Celaya de México, os senegaleses do Baillet Jammu e a Academia Andrés Valiente, Danzas e proxeccións de Panamá serán os protagonistas na noite macedá, nunha exhibición programada a partir das 22,30 horas, na rúa do Toural. A mesma hora no Parque da Preguiza en Verín, abrirán a festa da cultura os colombianos da Fundación Ballet Folclórica de Nobsa, seguidos do grupo de Taiwán Yuan Yuan Dance Group e pecharán a noite os serbios de Kud Srem.

A xira pola provincia, que durante dez días percorrerá 16 municipios ourensáns, rematará o mércores día 21 á 23,00 horas no Auditorio do Castelo coas seis compañías participantes nesta edición.