Simone Saibene, finalista dos premios Mestre Mateo: "Cinephilia xa é o programa referencia do cine galego"

Entre os finalistas dos Mestre Mateo estaba tamén Simone Saibene, presentador do programa Cinephilia de Telemiño. Por terceiro ano consecutivo optaba a tres galardóns ao estar nomeado a Mellor Comunicador, Mellor Programa e Mellor Realización. Con todo, desta vez non tiveron sorte. “Este ano non levamos o galardón, pero o feito de ser finalista, ademais durante varios anos seguidos, xa é un recoñemento importantísimo”, reflexiona Saibene, que insiste en que “é a demostración que Cinephilia xa é o programa de cinema de referencia do audiovisual galego”. 

Neste senso, asegura que “seguiremos traballando para dar visibilidade ao gran momento que está a vivir o noso audiovisual, en todas as súas facetas e a todos os profesionais que forman parte del”. En Cinephilia teñen por obxectivo dar espazo a toda a creatividade que está xurdindo en Galicia, “os case 300 programas que temos feito, e se poden ver libremente na páxina web de Telemiño, están para demostralo”, indica o comunicador.