Toén e Amoeiro avanzan na apertura das piscinas

O Concello de Toén anunciou onte, a través dunha nota informativa, a apertura das piscinas municipais. O espazo lúdico de baño do concello metropolitano abrirá por primeira vez as súas portas mañá, en horario de dúas da tarde a nove e media da noite. Segundo o texto da nota, as piscinas pecharán o 1 de setembro. Calquera modificación no horario de apertura será comunicada tamén a través dunha nota informativa, segundo reza o documento asinado polo alcalde de Toén, o popular Ricardo González.

Por outra banda, o Concello de Amoeiro xa seleccionou os socorristas que velarán pola seguridade dos usuarios da piscina municipal de Costademonte. Un decreto asinado polo rexedor socialista José Luis González asigna as dúas prazas dispoñibles para cubrir este servizo, e establece tamén un suplente en caso de vacante ou renuncia dos escollidos. Deste xeito, e de non renunciaren os candidatos, as piscinas teñen vía libre para abrir en materia de seguridade, un asunto de solución cada vez máis difícil para os concellos ourensáns pola escasez de profesionais.