Trelle celebra os cen anos de Benito

Para Benito Fernández López onte non foi un aniversario máis. Toda a súa familia concentrouse na aldea de Trelle, na de toda a vida, para celebrar con el os seus 100 anos. Todo un acontecemento na aldea, tanto que nin o alcalde, Ricardo González, quixo deixar pasar a oportunidade de celebrar cun dos veciños máis lonxevos do concello, entregándolle unha placa conmemorativa por esta efeméride.

“Coma toda a xente de antes, non levou unha vida fácil e tivo un pouco de todo”, explica o seu neto Víctor. Asegura que “foi un día de inmensa felicidade para toda a familia: xuntámonos fillos, netos, bisnetos e demais para celebralo por todo o alto”. Ademais, para a ocasión contrataron a unha pulpeira, que se encargou do menú da celebración. “Sempre lle tocou traballar de sol a sol e sempre sen queixarse”, conta Víctor, engadindo que “el era un dos que ían cada ano a pé ata Castela para a temporada da sega”.

Ademais, celebran que “dentro da idade, sigue mantendo perfectamente as súas facultades”. Isto demóstrao co seu afán de estar informado, “é un lector diario de La Región, e non hai unha noite que non se deite coa radio posta. Gústalle moito estar informado”. A familia é un dos pilares da vida de Benito, casou novo, coma era habitual na época, no ano 1947, e estivo coa súa dona, a día de hoxe falecida, durante 65 anos, ata o pasamento dela, Amparo Abad.

Deste xeito, catro xeracións da familia reuníronse onte en Trelle para celebrar unha data tan sinalada. E para algúns, non foi doado asistir. Se ben é certo que “a maioría estamos todos aquí, houbo uns primos que viñeron de pé feito dende Suíza para pasar este día en familia”.