A XVII edición do FITO traerá a Ourense 16 compañías de teatro

O Teatro Principal acolleu o anuncio da programación da 17ª edición do FITO, o Festival Internacional de Teatro de Ourense. Un total de 16 compañías actuarán nese e noutros espazos da cidade e de Celanova do 16 ao 27 de outubro, procedentes de Galicia, Madrid, Cataluña, Portugal e Arxentina.

A directora do festival, Fina Calleja, debullou un programa que promete cativar ao público. Cun mosaico de propostas escénicas que van desde a danza e o teatro de texto ata dramaturxias contemporáneas e revisións de clásicos, o FITO preséntase como unha celebración da diversidade teatral. O festival aposta por un importante compoñente de compromiso social e comunitario, poñendo en cuestión temas tan presentes no debate social como o son a ecoloxía, a inmigración, o papel da educación ou a desigualdade.

Haberá protagonismo da dirección e autoría femininas que chegan da man de compañías de longa traxectoria e de grupos emerxentes. Nomes recoñecidos como Mercedes Peón, Ana Vallés, Nuria Sotelo, Andrea Jiménez, Victoria Szpunberg, Rakel Camacho ou Quico Cadaval únense a un cartel que demostra a vitalidade e a renovación do teatro galego.

Pola súa parte, Jacobo Sutil, director da Axencia de Industrias Culturais da Xunta, destacou o “valor estratéxico” do FITO no calendario de festivais de artes escénicas de Galicia, subliñando a importancia de “sumar apoios doutras institucións” para enriquecer a programación. Tamén colaboran a Deputación e o Campus.