Xa dispoñibles as 72 parcelas do polígono agroforestal de Cualedro

RECUPERACIÓN DE TERRA AGRARIA

A Xunta vén de abrir o prazo para presentar ofertas para optar a algunha das parcelas do polígono agroforestal do concello de Cualedro

O alcalde de Cualedro, Luciano Rivero, e a conselleira do Medio Rural, María José Gómez, nunha visita ao polígono agroforestal. | La Región

O Diario Oficial de Galicia (DOG) xa recolle os pregos que regulan o procedemento de concorrencia competitiva para a selección de propostas para levar a cabo nas parcelas do polígono agroforestal de Cualedro.

Desenvolvido ao abeiro da Lei de recuperación da terra agraria de Galicia, o cualedrés abrangue unha superficie de 64 hectáreas, distribuídas en 72 parcelas de 70 titulares catastrais.

A actividade principal será gandaría en extensivo e cultivos complementarios á explotación, á que se lle poderá engadir o cultivo agrícola e a plantación de árbores para a obtención de froito.

As persoas interesadas en alugar ou comprar unha parcela deberán cumprir unha serie de requisitos de participación, o que inclúe os criterios de solvencia económica, técnica e profesional e as garantías que deban constituírse para asegurar o mantemento da proposta presentada, así como os criterios de avaliación que permitan seleccionar as mellores propostas presentadas e as obrigas que deban cumprir os participantes e os adxudicatarios finais.

En total póñense a disposición sete lotes, catro para arrendamento e tres para a súa venda. Os prezos mínimos para aluguer van dos 604,68 euros/ano aos 1413,56 euros/ano, e os da venda dos 3.3325,81 aos 16.815,80 euros.

Prazo

O período habilitado para a presentación de solicitudes, a través da sede electrónica da Xunta, é de 15 días hábiles, polo que finalizará o vindeiro 20 de abril.

Contenido patrocinado