'Os Crebinsky' levan aos cines o seu universo 'máxico' e cargado de 'tenrura galega' con Luís Tosar e Miguel de Lira

A película 'Os Crebinsky', protagonizada por Luís Tosar, Miguel de Lira, Sergio Zearreta e Celso Bugallo, chegará este venres aos cines españois, onde levará o seu 'universo máxico' e cargado de 'tenrura galega' que triunfou nos festivais do sector.

Así, tras un esforzo 'moi grande' de rodaxe en 35 milímetros, a película poderá verse en oito salas de Galicia, ademais de en Madrid, Barcelona, Valencia, Málaga e Xirona, tras triunfar no pasado Festival de Málaga, onde se fixo co premio ao mellor guión novel e o premio Signis á mellor longametraxe.

Segundo explicou este mércores o director da cinta, Enrique Otero, precisamente tras o seu pase na sección oficial deste festival, 'Os Crebinsky' recibiron dúas novas peticións de copias, unha para Málaga e outra para Valencia, e abriuse a posibilidade de iniciar a súa distribución en Francia, Alemaña e Rusia.

Para esta distribución, o equipo desta singular película apostará pola 'versión orixinal' do filme, na que teñen cabida cinco linguas distintas, dado que traducila sería 'matala'.

'TENRURA GALEGA'

A experiencia no Festival de Málaga favoreceu para o actor Miguel de Lira, que é tamén produtor e guionista do filme, a creación dunha 'nova marca' para a cinta, a 'tenrura galega' -en alusión á marca 'Ternera Gallega'-, dado que esta foi 'unha das palabras que máis soou' na súa emisión.

Do mesmo xeito, o actor Luís Tosar, que tamén exerce de produtor da cinta, destacou o 'humor' presente na historia, que crea 'todo un universo paralelo' de carácter 'máxico' e a posibilidade de interpretar un papel diferente aos que usualmente encarna.

'É unha película absolutamente pensada para ver en pantalla grande', explicou Tosar, que viu neste lugar o emprazamento no que se consegue a comuñón co público' e animou aos espectadores a ir ás salas.

Pola súa banda, o conselleiro de Cultura, Roberto Varela, eloxiou esta 'extraordinaria' película, que 'crea un universo visual e icónico que ten moito ver coa tradición' galega 'e conecta co cine psicodélico' dos anos 60.

OS CREBINSKY

A historia de 'Os Crebinsky' dá comezo cando unhas choivas torrenciais provocan a crecida do río, que alaga un pobo, e a corrente arrastra aos irmáns Crebinsky e á súa vaca, que aparecen vivos nun lugar da costa.

Tras isto, os irmáns sobreviven a base de ir recollendo cousas que trae o mar, as 'crebas', e illados dos acontecementos bélicos que están ocorrendo na súa contorna.

O ritmo cotián de convivencia coa súa vaca Muchka vese alterado cando esta desaparece e é entón cando os irmáns inician unha procura desesperada que os levará desde a costa cara ao interior.

Isto converte ao filme nunha road movie 'auténtica' con trazos de surrealismo e cine bélico.

En particular, a película xorde dun curto, realizado en 2002, onde xa se perfilaba a estética e algúns personaxes, e rodouse nun 90 por cento en exteriores de Ortegal, Santiago e Portomarín.

A música da película combina os ritmos do leste de Europa interpretados pola 'Banca Crebinsky', que dá o seu salto das pantallas aos teatros ataviada cos uniformes de banda de música soviética da época.

APOIO Ao SECTOR

Durante a presentación a estrea, o actor Miguel de Lira aproveitou para solicitar ao conselleiro de Cultura que o departamento que dirixe 'manteña o mesmo apoio' ao sector audiovisual que os seus predecesores.

En concreto, Miguel de Lira recordou que o cine é un 'sector estratéxico' en Galicia, polo que indicou que 'aínda en tempos de crises' sígase, con pulso firme e decidido, o apoio a este sector', do mesmo xeito que se facía, recordou, durante o goberno de Manuel Fraga e o bipartito.

Pola súa banda, Roberto Varela asegurou que o audiovisual galego 'pode contar co apoio da consellería' ao '100 por cen' e reclamou que se traballe 'máis' na 'promoción das películas' e a consecución de público.