As airas de Viana do Bolo volverán gozar das comparsas

Seis anos pasaron xa dende que un grupo de veciños da Chaira, en Viana do Bolo, decidiu recuperar a ancestral tradición das comparsas. Estas agrupacións foron durante décadas unha tradición moi arraigada do Entroido en varias aldeas do municipio e, tras varios anos en branco, no 2019 Pixeiros e Seoane puxeron todo o seu afán en recuperala.

Este 2025, como non podía ser doutro xeito, volven. Farano en Seoane de Arriba, Mourisca, as aldeas do Padre Eterno e Pradocabalos o sábado 22 de febreiro e o sábado 1 de marzo. No caso de Seoane de Arriba e Mourisca, será o día 22 ás 11:00 horas na primeira aldea e a partir das 17:00 na segunda. O 1 de marzo será a quenda das aldeas do Padre Eterno ás 11:00 horas e de Pradocabalos ás 17:00 horas.

A “ronda, o brindis e a disputa” que conforman a comparsas tomarán as “airas” despois dun gran esforzo por parte dos encargados de levala a cabo. E é que recuperala supuxo un gran esforzo, xa que, como ben explica Antucho Espinosa, un dos artífices, “é preciso moito compromiso e moito traballo”.

Meses antes do Entroido, a agrupación comeza os seus ensaios acompañada polos actores. Eran e seguirán sendo catro os papeis principais: o director, a señorita, o pallaso e o home de esquilas que, acompañados por outros protagonistas que varían en función dos anos, encárganse de realizar unha máxica actuación.

Unha vez na aldea, o home de esquilas -coñecido actualmente como boteiro- adiantase ao grupo para “pedir permiso” aos veciños do lugar. Os músicos comezan coa “ronda” e percorren as rúas da aldea acompañados dos diferentes personaxes que exercerán os seus cometidos durante o percorrido. Finalizado este, a agrupación diríxese a unha “aira” ampla -sitio chan, próximo ás casas, de terra firme, no que antigamente se procedía á malla do cereal- para continuar co “brindis”. O papel do director será fundamental durante esta parte, xa que, de maneira improvisada, dedicará, mediante versos, cancións a diferentes espectadores.

Antigamente, aqueles cos que o director decidía “brindar” tiñan a obriga de pagar unhas pesetas á agrupación. Finalizado o “brindis”, chega o momento da “disputa”, unha actuación teatral en verso na que os diferentes personaxes teñen como obxectivo facer rir ao público a través da sátira. Durante esta, faise referencia á actualidade política e social da localidade, da comunidade e mesmo do estado, así como a anécdotas de diferentes veciños acontecidas no último ano.

Esta edición “haberá sorpresas”, confesa Antucho, e engade que “as risas estarán aseguradas”. “É moi gratificante ver como a xente maior se emociona o vivir de novo unha Comparsa nas súas terras”, declara. Pensando no futuro, dende a “comitiva” desta agrupación afirman que é necesario que “a xente se anime a participar e a continuar con esta tradición”. “O importante é loitar polo noso Entroido, que a xente moza se implique e poder dar continuidade ás actividades que fan que a nosa sexa unha celebración diferente”, engaden.