Albarellos volve adiantar o entroido cunha gran festa

Un ano máis, e xa van seis, a parroquia de Albarellos, no concello de Monterrei, anticípase ás datas establecidas neste vindeiro mes coa súa festa de pre-entroido, que terá lugar o vindeiro 8 de febreiro.

A celebración arrancará a partir das 19,00 horas, coa quedada de “choqueiros” e bombos na praza Ángel Medeiros, previo ao desfile que se estendará ata a hora da cea, e que promete un animado percorrido polas rúas e bares da vila, con música, disfraces e moita troula.

O precursor desta iniciativa popular, Alberto Rodríguez, salienta que nada sería posible sen a “participación e colaboración” do tecido asociativo de Albarellos, e cita a axuda da asociación veciñal local, da comunidade de montes San Salvador, da asociación de mulleres rurais “25 de xullo”, d’O Trebón de Mildeu e máis do Concello. Para Rodríguez o importante é dinamizar a parroquia, e confesa que malia o esforzo, “desfruto vendo á xente desfrutar”.

Tralo desfile terá lugar ás 21,30 horas cea popular, tamén na praza Ángel Medeiros, a base de bocadillos de porco ao espeto. As entradas, a 12 e 8 euros, están á venda na biblioteca local e nos bares O Campo, Celta e Progreso, así como no bar A Canteira e na tenda Tirabeke, en Verín.

Música e autobús

Para tódolos interesados en acudir sen ter que coller o coche, haberá transporte en bus dende a estación de Verín, coa ida ás 18,30 e a volta arredor das 00,30 horas. Trala cea, ás 22,30 horas está prevista a actuación de Festiculores Troupe, e ás 00,30 horas de DJ Moncho, ambos na praza.

Os organizadores tamén fixeron broches, imáns e chisqueiros de cigarróns con distintos motivos para colaborar economicamente.