Laza comeza o seu Entroido co primeiro Venres de Folión

A vila lazana volveu vibrar o venres tras un ano de espera co son dos chocos e os bombos. Foi unha noite cunha grande participación, na que tampouco faltaron os fachóns, e na que por sorte a choiva non fixo acto de presenza. O que si voou foi a cinsa, que choveu sobre os participantes no folión dende as ventás das casas.

Máis dun centenar de chocos saíron dende o fondo da Cerdeiriña percorrendo as rúas de Laza continuando cara Souteliño, correndo cos seus cintos e as zamarras nas mans, nun anticipo do que está por vir. Acompañáronos no folión numerosos grupos de bombos que fixeron asimesmo retumbar as rúas ao seu paso.

Cada un acabou o folión como e onde puido: uns só chegaron ata A Picota, outros en cambio remataron en Souteliño e algúns en Cimadevila.

Con este pistoletazo de saída, Laza prepárase para dous Venres de Folións máis ata que o 27 de febreiro teña lugar o Xoves de Comadres.

Matamá e Castro comezan este sábado

Esta noite será o turno do Antroido de Matamá, que arranca co seu primeiro Sábado de Folión arredor das 22,00 horas. O folión partirá da Praza da Cruceiro, e contará coa participación dos Bombeiros de Vences (Monterrei).

Castro, pola súa banda, celebra tamén esta noite o inicio do seu Entroido coa Cea de Folión.