Laza e Matamá vivirán hoxe o inicio da festa cos folións

Esta noite volven os folións e con eles arrancarán algúns entroidos como o de Laza, coa celebración do primeiro dos catro folións que terán lugar durante os vindeiros venres, e que prometen ir quentando o ambiente de cara ao próximo mes.

Así, a partir das 23,00 horas as rúas de Laza resonarán un ano máis tarde co son e o ritmo que marquen os chocos e os bombos. Acompañados por fachóns, os folións partirán dende o fondo da Cerdeiriña, e percorrerán as rúas Cerdeiriña, A Picota, A Rúa e Souteliño.

Pola súa banda, Matamá inicia mañá o seu Antroido co primeiro folión ás 23,00 horas dende o Cruceiro, que ademais dos chocos e bombos locais contará cos Bombeiros de Vences.

Verín e Albarellos

Esta noite en Verín, ademais das chocas, haberá folión na Rasela. E mañá Albarellos vivirá o seu xa tradicional VI Pre-entroido cunha grande festa.