O meco Milei coñeceu o enxebre ritual das Teixugueiras-Xinzo

Subidas e baixadas, golpes, caídas e máis dun descanso sobre o asfalto ou nas cunetas, resumen a viaxe de onte de Milei polas aldeas de As Teixugueiras e Xinzo. Neste recuncho do concello de Cartelle, o Entroido vívese con emoción e certa anarquía -respectando a tradición- no ritual que ten ao meco como protagonista.

Perrucas, gorros, roupa cómoda e certas condicións físicas son os requisitos para tirar do carro no que onte ía Milei, e que nos últimos anos xa probaron outros personaxes nacionais e internacionais. Unha viaxe que emulaba -contan os máis veteranos- a que foi sometido un inxusto cobrador de impostos en tempos de Felipe V, e que hoxe é motivo de festa e confraternización veciñal.

A comitiva, onde non falta o peliqueiro e a música dos Rianxeiros, percorreu durante varias horas a parroquia que incluíu a baixada polo Cótaro e a subida pola Barreira ata o Outeiro do Meco. A festa rematou á tardiña, coa lectura do testamento e a música de Os Rianxeiros.