Os nenos recuperaron a tradición dos bolouros na Praza Cervantes

“Como se fixo toda a vida”, así elaboraron os cativos e cativas de Maceda os famosos bolouros, unhas boliñas de barro negro que, antigamente, eran as que se empregaban para pintar a cara durante a festividade do Entroido.

Esta tradición xurdiu nos pobos de Tioira, Carguizoi e Xinzo de Costa, en Maceda, onde se collía -e aínda se fai- o barro especial, e os nenos xogaban a pintarse os uns aos outros. En Maceda recordan que antes, para o Entroido, non existía toda a oferta de disfraces e teas que hai actualmente, e a xente tiña que “botar man do que había” e agudizar o enxeño.

Este luns a media mañá, os cativos participaron nunha bolourada. Antes celebrouse un obradoiro para que puidesen aprender a facer estas pequenas bolas.

A Charanga A Felga animou toda a mañá de xogos na Praza Miguel de Cervantes e, ao remate da xornada, houbo pizza para todos os rapaces e rapazas. A Fenda e A Chuche Mecánica organizaron este tradicional evento coa colaboración da ANPA do Colexio de Maceda, o Concello e o Club Ciclista Maceda.

O Entroido continuará hoxe na vila cun desfile de carrozas e comparsas que partirá ás 17,30 horas da Praza das Canteiras. A Orquesta Fusión poñerá a nota musical dende as 19,00 horas. A cita será na Praza das Toldas.