Xinzo terá máis vixiantes e máis cámaras durante as festas do Entroido

O secretario xeral da Subdelegación do Goberno en Ourense, Manuel Arias, e o alcalde de Xinzo de Limia, Amador Díaz, copresidiron a Xunta Local de Seguridade na que se coordinou o dispositivo de seguridade de cara as datas do Entroido 2025 e se analizou a situación da seguridade cidadá no municipio, os casos de violencia de xénero e o Plan Director para a Convivencia nos colexios.

Sobre o Entroido, aos efectivos da Garda Civil e Policía Local que velarán pola seguridade sumaranse catro vixiantes contratados polo Concello. A Garda Civil incrementará as cámaras de vixilancia e intensificaranse ademais os controis de alcol e drogas nas estradas.

Xinzo contará cun punto violeta durante todo o Entroido, para previr agresións sexuais ou casos de violencia sobre as mulleres. O seu persoal estará coordinado coas forzas e corpos de seguridade, e parte deles percorrerán as rúas para prestar axuda a quen o precise.

A xunta local destacou que no 2024 se produciu en Xinzo un aumento dos delitos contra o patrimonio. No tocante á violencia de xénero, dos 536 casos activos neste momento na provincia, 24 corresponden ao Concello de Xinzo, e en 19 deles o agresor conta ten prohibido de aproximación e comunicación coa vítima.

Na reunión tamén estiveron presentes representantes da Xunta; Garda Civil, Policía Local, Protección Civil e Bombeiros de Xinzo.

Críticas a programación

O BNG de Limia criticou a programación do Entroido, que tilda de “personalista, intervencionista e anacrónica”. Os concelleiros Camilo Vila e Manuel Pozo cren que é consecuencia de prescindir da Comisión veciñal, ao “querer convertelo nun carnaval capitalino calquera”, e advirten de que a súa supresión “réstalle a transparencia que merece”. Tamén criticaron a contratación da artista Leticia Sabater para a data máis infantil: “Unha proxección hipersexualizada e unha mensaxe antieducativa non poden presidir a nosa festa tradicional”, asegurou Vila.