Adeus a Aurelio Vila Obregón, artesán lazano das 1.300 caretas de Peliqueiro

Acábanos de deixar Aurelio Vila Obregón (1944-2025), coñecido como “Lelo”, artesán de caretas de Peliqueiro e mestre de artesáns. Que a terra che sexa leve, como a levidade de tantas caretas que fixeches, unhas 1.300 según me dixo el mesmo, tanto de peliqueiros como de felos, cigarróns e zarramoncalleiros.

Ademais dos lazanos, están en débeda con el os de Campobecerros, Cualedro, Maceda, Sarreaus, Verín... e moitos museos do mundo que tutelan as súas caretas.

Fíxenlle varias entrevistas sobre o seu traballo ao longo dos anos, a última en xaneiro deste mesmo ano. Contoume moitas cousas e secretiños de porqué as súas caretas sentaban tan ben. De feito, el modificou e inventou varios elementos das caretas para que se adaptasen á cara coma un guante.

O Entroido de Laza está de loito, todos os lazanos estamos de loito, pero sempre quedará o seu inmenso legado e contribución á artesanía do Entroido.