Alfonso Rueda apremia ao Goberno central: "É o momento de ir a pola gratuidade da AP-9"

O presidente da Xunta, Alfonso Rueda, instou ao Goberno central a "ser ambicioso" e ir a "pola gratuidade da AP-9" despois de coñecerse a pasada semana o ditame da Comisión Europea que declara ilegal a ampliación da concesión da autoestrada que conecta Ferrol con Tui.

A preguntas dos medios, o titular do Goberno galego insistiu en que "é o momento" e "dan as contas", aínda que sinalou que non é "moi optimista".

Neste sentido, apuntou aos "atrasos e adiamentos" respecto da transferencia da autoestrada, pero manifestou que a resolución da Unión Europea "cambia o escenario".

Así, xa avanzou que pedirán ao Executivo central que "se materialicen as operacións xurídicas que sexan necesarias" para que a AP-9 "sexa gratuíta para os usuarios".