Carlos Babío, presidente da CRMH da Coruña: “O fallo do Tribunal Supremo é o punto final da batalla xudicial por Meirás"

Hasta que Carlos Babío publicou en 2017 “Un pazo, un caudillo, un espolio” a investigación académica sobre o Pazo de Meirás como residencia oficial de verán do Xefe do Estado foi nula. Aquel estudo foi a principal arma da Avogacía do Estado na disputa contra a familia Franco pola propiedade do inmóbel.

Pregunta. Que significa a sentenza do Supremo?

Respuesta. É a terceira sentenza que avala as teses do memorialismo galego. Ten unha parte demoledora. Demostra o que dixemos sempre: que o Pazo de Meirás foi un roubo, baixo ameazas e extorsións, baixo un réxime totalitario. Conseguimos desmontar o relato da propaganda da ditadura. E conseguímolo a base de investigar, documentar, divulgar e, finalmente, recuperar. Sen o memorialismo aquí non habería causa, nin procedementos, nin absolutamente nada. Ademais, o caso de Meirás abre posibilidades, é unha ferramenta para loitar tamén contra outras impunidades do franquismo aínda presentes.

P. Mais a sentenza ten outra parte que non lle gusta tanto.

R. Aos Franco preocúpanlles dúas cousas: o relato da ditadura e os cartos. O relato xa o perderon. Mais a sentenza ten unha parte que valoramos máis negativamente: o feito de que se recoñeza aos herdeiros do ditador como posuidores de “boa fe” do Pazo de Meirás entre 1975 e o ano 2020, que é cando entra o Estado como propietario provisorio. E iso arranca naquela comisión de expertos do Parlamento galego que incluíu esa consideración, a de boa fe, co único voto particular do Concello de Sada.

P. Os Franco van ser indemnizados. Hai vía para se opoñer?

R. Hai que matizar o termo “indemnización”, que está en todos os medios. Realmente o que ten que facerse é unha liquidación. Os Franco terán que presentar documentos e xustificantes contables daquilo ao que teñan dereito para que o Estado proceda á liquidación.

P. Pero haberá oposición?

R. Non vemos posibilidades de modificar a decisión do Supremo. Todas as partes tiñan claro que este fallo ía ser o final do percorrido.

P. Daquela: punto e final?

R. Entendemos que si. O fallo do Supremo é o punto final da batalla xudicial por Meirás.

P. Ao goberno o fallo parécelle unha boa solución. Permitirá avanzar noutros aspectos de recoñecemento das vítimas e do lugar de memoria?

R. O único que pedimos e agardamos deste goberno é que proceda a facer unha resignificación do Pazo de Meirás para poder desfrutar e coñecer un lugar de memoria singular no Estado español, que respecte a historia e faga un plan de usos dese espazo. E sobre todo, que deixe de excluír ao memorialismo galego do relato.

P. Queda moito por coñecer do Pazo de Franco?

R. Moitísimo. Hai un volume enorme de documentación por estudar.