Vídeo | Ofrenda ao Apóstolo Santiago en Compostela

"Tender pontes no canto de levantar muros; ofrecer solucións, e non crear novos problemas á xente; animar á concordia, en vez de sementar a crispación". Foi unha das mensaxes principais do presidente da Xunta de Galicia na súa invocación o Apóstolo na Catedral de Santiago no día grande de Galicia.

O presidente da Xunta, Alfonso Rueda, exerce de delegado rexio este 25 de xullo, Día Nacional de Galicia, na ofrenda ao Apóstolo 2025. Faino por encargo do rei Filipe VI. Ë a segunda vez que o mandatario autonómico asume este rol, logo de substituír a Alberto Núñez Feijóo no 2023. O monarca acudiu en persoa a Santiago a presidir a ofrenda no 2020, 2021 e 2022. O ano pasado Casa Real seleccionou ao presidente do Parlamento Miguel Santalices. Antes que Rueda, os seus predecesores exerceron tamén esta responsabilidade. Manuel Fraga fíxoo no 2000, 2001, 2005 e 2008. Emilio Pérez Touriño no 2006 e Alberto Núñez Feijóo no 2009, 2015 e 2017. Tamén foi escollido para o 2013, mais o accidente de Angrois fixo que a Ofrenda non se levase a cabo.