A industria da construción garante ata 133.000 postos de traballo en Galicia

O sector da construción en Galicia celebrou hoxe o seu I Encontro coa Prensa, un evento no que se destacou a importancia da industria para o desenvolvemento económico e social da comunidade e se abordaron os principais desafíos de futuro. O presidente da Federación Galega da Construción, Diego Vázquez Reino, protagonizou o encontro cunha intervención na que puxo en valor a evolución do sector nos últimos anos.

Na súa intervención, Vázquez Reino lembrou os momentos críticos atravesados pola construción, dende a crise económica de 2008 ata os efectos da pandemia e a recente inflación nos materiais. Destacou o papel clave do sector na xeración de emprego, con máis de 133.000 traballadores en Galicia, e o seu peso na economía, representando o 9,1% do PIB galego.

“O sector da construción é esencial para o futuro de Galicia. Non só xeramos emprego e riqueza, senón que construímos os espazos onde a sociedade se desenvolve: vivendas, hospitais, escolas e infraestruturas clave. Agora máis que nunca, é fundamental modernizarnos e apostar pola industrialización e a dixitalización”, afirmou Vázquez Reino.

Os retos

Durante o encontro tamén se puxo o foco en retos como a falta de man de obra cualificada e a necesidade de mellorar a seguridade laboral. Ademais, destacouse o papel do Clúster da Construción de Galicia, creado en 2023, como motor de transformación do sector cara a un modelo máis sostible e innovador.

A Federación Galega da Construción reafirmou o seu compromiso de traballar conxuntamente coa administración e a sociedade para avanzar na profesionalización do sector e no impulso de proxectos estratéxicos como a construción industrializada e a dixitalización.

O encontro concluíu cun chamamento aos medios de comunicación para continuar dando visibilidade a un sector que se redefine e que busca atraer novo talento para garantir a súa continuidade e competitividade.