Obxectivo: dinamizar a economía rural

Galicia reafírmase no seu compromiso co emprendemento como un motor clave para a xeración de emprego e riqueza. No centro desta estratexia atópase a Rede de polos de emprendemento e apoio ao emprego, unha iniciativa que, dende o seu nacemento en xullo de 2022, se converteu nun referente para os emprendedores galegos. Esta rede, que ofrece asesoramento gratuíto e individualizado, non só apoia a quen busca dar os seus primeiros pasos empresariais, senón que tamén presta axuda a aqueles proxectos xa consolidados que precisan un impulso para seguir crecendo. O seu gran obxectivo, ademais, é dinamizar a economía local e fixar poboación no rural, combatendo así o desafío demográfico.

Dende a súa posta en marcha, os polos atenderon máis de 4.800 proxectos nas súas 15 oficinas activas no territorio. A provincia de Ourense conta con catro sedes (O Carballiño, Baños de Molgas, O Barco de Valdeorras e Verín), a de Pontevedra con tres (Silleda, O Porriño e Vilanova de Arousa), a da Coruña con outras tres (Ferrol, Coristanco e Melide) e a de Lugo con cinco (Friol, Mondoñedo, Sarria, A Fonsagrada e Monforte de Lemos).

A nivel cuantitativo, os datos subliñan o éxito da iniciativa en Ourense, onde atenderon máis de 900 proxectos. Un dos datos máis significativos é a alta participación feminina, con máis do 55% dos proxectos liderados por mulleres, demostrando o potencial do talento emprendedor.

O sector servizos é o máis representado, seguido de preto pola hostalaría e o comercio, reflectindo as tendencias económicas e as necesidades do tecido empresarial local. Dentro do asesoramento directo, a actividade dos polos inclúe a organización de case 3.000 titorías e ademais neles lévanse organizado máis de 440 actividades, entre reunións con entidades ou sesións de formación e eventos de networking.

A Rede de polos de emprendemento e apoio ao emprego consolídase así como unha ferramenta indispensable para o emprendemento, ingrediente fundamental para o desenvolvemento económico e social.

Sarah-Jane Borcuk, artesanía Enxebre de Valdeorras: Artesanía e creatividade da madeira dende Valdeorras

Sarah-Jane Borcuk iniciouse como autónoma na artesanía da madeira no 2020, “mala época, foi difícil” e chegou ó polo de emprendemento do Barco de Valdeorras a finais do 2022. “Entereime polo xornal, que o abriran xusto ao lado onde teño o taller, entón dixen: teño que ir ver de que vai isto”.

Deste xeito descubriu un espazo pensado para “asesoramento, acompañamento e resolver calquera dúbida que teñas; por exemplo, non sabes facer facturas, eles poden botarche unha man, meterte nunha rede de contactos…”. Este foi o obxectivo co que se achegou á oficina, pero acabou atopando “moito máis que asesoramento e acompañamento”. Para Sarah Borcuk a Rede de polos de emprendemento “foi un descubrimiento que foi unha pena que non os coñecer en 2020 cando comecei”.

Nestes máis de dous anos de acompañamento, a valoración de Sarah é moi positiva, tanto a nivel persoal como para o seu negocio. “Podo dicir que no polo de emprendemento, polo menos as persoas que están aquí na oficina do Barco teñen unha vocación, unhas ganas de axudar que realmente pois é o que máis me gusta de poder estar metida nisto”. En termos empresariais, “teño visto como vai e pouco a pouco o meu negocio, a miña pequena marca de artesanía, vai medrando pouquiño a pouco” grazas ós consellos, “o apoio, esas palmadiñas na espalda ou mesmo ese ‘Non Sara, mellor non, isto non é tan boa idea’. Ese golpe de realidade, tamén é moi bo”, explica.

Rosa Rodríguez, O Campiño alojamientos: Aposta turística e rehabilitación de vivendas no rural da Limia

O Campiño é unha pensión en réxime de apartamentos que se atopa na súa primeira fase. Detrás del están Rosa Rodríguez e a súa parella, que se namoraron dunhas casas en Trasmiras no ano 2021. “Vinas e díxenlle que tiñamos que mercalas”, pero as obras para o seu proxecto turístico non comezaron ata o 2024. “Pedimos unha subvención á Xunta, pero retrasouse todo pola pandemia”, explica.

“Entre permisos e unha cousa e outra rematamos a obra en xaneiro, Turismo deunos a licencia en abril e o primeiro hóspede tivémolo en maio e, despois, xullo e agosto, a verdade é que moi contentos”, conta Rosa. Neste tempo, os visitantes do Campiño, “puxéronnos moi boas reseñas e a todo o mundo lle gusta moito”.

Na Rede de polos de emprendemento comezaron “hai pouquiño, non coñeciamos esta oficina de Verín e recomendóunola unha rapaza de aquí, de Trasmiras”. Non tardaron en poñerse en contacto e comezar o proceso de asesoramento, subvencións ou sinerxias; déronnos “unha orientación para saber cara a onde tiñamos que ir”. Rosa Rodríguez amósase “encantada”, tamén con “Brais e Ángela, que son moi majos”. Da man delas agarda poñer pronto en marcha a segunda fase do proxecto “que empezaremos cando teñamos posibilidades” e que lles permitirá ampliar a súa capacidade hoteleira.

Pedro González, Zirall: Renovación dun negocio de tradición familiar en Allariz

O caso de Pedro González é o dun legado familiar. Foi o seu bisavó, farmacéutico de Allariz, o que iniciou o negocio de licores e preparados para licores artesanais “Alí facía preparados de herbas para facer licor e niso foi traballando o meu avó, despois o meu tío comezou a comercializar os licores e agora vendemos as dúas cousas, tanto os preparados para facer o licor coma os propios licores”, explica. Trala xubilación do seu tío o ano pasado, Pedro, que levaba 10 anos vivindo fóra, “decidín volver para aquí e retomar o negocio”.

En Zirall había “bastantes cousas que modernizar” e niso comezou traballando arreo “coas portas pechadas durante uns seis meses” para traballar en tódolos ámbitos, “tanto na producción, como renovar a imaxe e tamén financieiramente, que quizais foi o máis complexo, para conseguir financiación e poñer isto en marcha de novo”.

Ós polos de emprendemento chegou da man do Igape, onde solicitou unha subvención para poder financiar o relanzamento dos licores Zirall. “A min correspóndeme o polo de Baños de Molgas, que foi o que me recomendaron e axudáronme a xestionar o tema da subvención, preparar o plan financieiro, que tamén é útil para o meu negocio, para ter un pouco de visibilidade e saber cales son as cifras que podo manexar”. Por todo isto, a valoración de Pedro González é “moi positiva”. Da súa experiencia salienta “o meu contacto, José Manuel, que é unha persoa moi implicada, fai todo moi áxil e os seus consellos son moi útiles”.