Rueda anuncia 4.000 pisos novos en marcha para 2026

Meis converteuse durante a fin de semana no escenario onde o Goberno galego trazou as liñas de acción dun 2026 que se prevé intenso. Tras dous días de reunións internas, o presidente da Xunta, Alfonso Rueda, compareceu onte ante os medios para debullar unha folla de ruta que aspira a deixar pegada nalgúns dos ámbitos máis sensibles da comunidade: a vivenda, a innovación científica e tecnolóxica, a dependencia, a educación e a mobilidade.

Rueda fixo o anuncio cun ton firme: o compromiso de levantar 4.000 vivendas públicas durante a actual lexislatura está, asegura, encamiñado ao seu cumprimento. Das 3.000 xa en marcha, sumaranse 1.000 máis ao longo do próximo ano, cun reparto que reserva porcentaxes significativas aos menores de 36 anos: o 25% das unidades en venda e o 40% das destinadas ao alugueiro. “Somos un Goberno de palabra”, proclamou, reivindicando un Executivo “cohesionado” e traballando a unha soa voz.

A xornada en Meis serviu tamén para mostrar a vontade da Xunta de situar Galicia nun novo escenario de I+G+i. A creación da Fundación Galtia, orientada á captación de talento, e o arranque da Fábrica de Intelixencia Artificial converteranse en dous dos piares do salto tecnolóxico previsto. Nos plans figura tamén que, en 2026, a comunidade dispoña do primeiro centro público de protonterapia do Estado, un fito sanitario que Rueda subliñou como “estratéxico” para o sistema público galego.

O presidente detívose tamén nun ámbito delicado: a atención á dependencia. A Xunta confía en alcanzar a cifra histórica de 100.000 persoas dependentes atendidas ao longo do próximo ano, aínda que advirte dun posible freo no caso de que prospere o recurso presentado polo Goberno central contra o plan autonómico de reforzo do sector. Rueda cualificou a situación como “un risco de bloqueo que non debería producirse”.

No terreo normativo, 2026 será un ano de reformas e novos marcos legais. Agárdase aprobar a primeira Lei de Educación Dixital de Galicia, así como dar luz verde á Lei de Administración Local renovada. Ademais, o período estará marcado polo impulso ao Pacto pola Lingua e pola actualización do Plan Xeral de Normalización da Lingua Galega, nun contexto no que tamén abrirá as súas portas o Centro de Artes Dixitais.

En materia de vivenda, a Xunta avanzará na idea de transformar espazos abandonados: compraranse locais en desuso para convertelos en vivenda, ao tempo que se porán en marcha axudas específicas para a rehabilitación de fogares destinados a profesionais captados a través de programas de talento.

O ano entrante tamén será decisivo na política galega de infraestruturas tras a asunción das competencias en materia de costa. Continúa a aposta polo Camiño do Litoral, unha ruta que aspira a conectar Ribadeo con A Guarda. E mentres tanto, nas vías de comunicación terrestre, Rueda anticipou avances en corredores estratéxicos como a Tui–A Guarda, Nadela–Sarria, Brión–Noia, a AC da Costa da Morte, a Variante de Viveiro e o enlace rápido ata A Lanzada. As estacións intermodais da Coruña e Lugo quedarán listas para entrar en funcionamento.

No capítulo enerxético, a Xunta promete continuar co plan de repotenciación eólica que reduciría o número de aeroxeradores de máis de 2.500 a arredor de 700, incrementando ao mesmo tempo un 35% a produción de enerxía. Un proxecto que, segundo criticou Rueda, se ve dificultado polo recurso do Executivo central, ao que cualificou de “incomprensible”.