Traballo atribúe a unha reorganización na xefatura territorial dous novos cesamentos

A Consellería de Traballo atribúe a unha "reorganización" na xefatura territorial de A Coruña, iniciada en setembro e coa finalidade de "mellorar o funcionamento interno", os dous novos relevos que se produciron no departamento.

Estes dous cambios enmárcanse nun proceso "de reestruturación" que, segundo aseguran fontes da consellería, non solo tivo lugar en Traballo senón que tamén afectou á área de Servizos Sociais.

De feito, afirman que son cambios de postos que "xa se decidiron hai meses e agora lévanse a cabo tras completarse o pertinente procedemento administrativo".

Deste xeito, as fontes consultadas desvinculan os novos cesamentos da denominada "Operación Zeta", que investiga unha suposta fraude en axudas para a formación e pola que deixou o seu posto o director de Traballo, Odilo Martiñá.

Ao respecto, o departamento que dirixe Beatriz Mato destaca que nas últimas datas se materializaron catro cesamentos na consellería e tan só Martiñá era alto cargo. Un quinto cesamento a maiores correspóndese coa Deputación, segundo indica Traballo.