A Xeración Nós, Medalla do Parlamento de Galicia 2021

A Mesa do Parlamento de Galicia acordou, na súa reunión deste martes, por unanimidade, conceder a Medalla do Parlamento á Xeración Nós e aos seus discípulos. O galardón recoñece o legado galeguista dos integrantes da Xeración Nós, coincidindo co seu primeiro centenario.

O 30 de outubro de 1920 ve a luz o primeiro número da revista `Nós`, ideada, editada e sostida, entre 1920 e 1936, por un grupo de intelectuais galeguistas liderados por Antón Losada Diéguez, Vicente Risco, Alfonso R. Castelao, Arturo Noguerol, Florentino López Cuevillas e Ramón Otero Pedrayo, círculo que se iría ampliando a un conxunto máis heteroxéneo de colaboradores que participaron neste proxecto, nas súas distintas fases, até a súa desaparición en 1936.

Personalidades como Xavier Prado "Lameiro", Ánxel Casal ou Ramón Cabanillas resultan esenciais neste proxecto, do mesmo xeito que todas as figuras --preto de 200-- do denominado segundo círculo, que colaboraron nas diferentes etapas da revista.

Galeguismo

Uns e outros conformaron un grupo de persoas cosmopolitas, europeístas, cultas e vangardistas, mais profundamente enraizadas na realidade local. Con eles, a denominada Xeración Nós, o galeguismo comezou unha nova andaina.

A experiencia de Nós finalizou abruptamente co golpe de estado de 1936, a guerra civil e a ditadura, pero a súa semente e o seu exemplo permaneceron imperecederos na Galicia territorial e na emigración, sinala o acordo adoptado pola Mesa da Cámara.

O vixente Estatuto de Autonomía de Galicia, promulgado o 6 de abril de 1981, é "herdeiro e continuador" do truncado Estatuto de 1936, froito do esforzo e o compromiso galeguista impulsado pola Xeración Nós.

Galicia, en débeda coa Xeración Nós

O acordo da Mesa considera que a autonomía política da Galicia actual é tributaria da semente depositada pola Xeración Nós, mérito que a Cámara galega quere recoñecer coa concesión da Medalla do Parlamento de Galicia 2021.

Por iso, no primeiro centenario da aparición da revista Nós, a Medalla do Parlamento de Galicia 2021 ao conxunto dos integrantes da Xeración Nós e os seus discípulos será entregada ao catro únicas fundacións que, a día de hoxe, perpetúan a memoria das figuras constituíntes da Xeración Nós: Fundación Otero Pedrayo, Fundación Castelao, Fundación Antón Losada Diéguez e Fundación Vicente Risco.

40 aniversario do Estatuto

Do mesmo xeito que nas edicións anteriores, a Medalla do Parlamento de Galicia será entregada do próximo 6 de abril, aniversario da promulgación do Estatuto de Autonomía de Galicia, que este ano celebra o seu 40 aniversario.

No pasado ano, 2020, a Medalla do Parlamento de Galicia non foi concedida porque a Cámara se atopaba disolta na data prevista para o acto de entrega que coincidía, ademais, co confinamento derivado da primeira onda da covid-19.