A Xunta planea ter lista para o verán a nova lei do clima

A directora xeral de Enerxías Renovables e Cambio Climático, Paula Uría, confirmou nun acto celebrado onte en Santiago de Compostela que a Xunta xa tramita a lei do clima, coa que pretende asumir as competencias para enviar alertas meteorolóxicas, e que a terá lista no verán.

A finalidade deste precepto é abarcar cuestións como o servizo meteorolóxico e climático de Galicia, sobre os que a Xunta pretende lexislar. Ademais, segundo afirmou Paula Uría, esta disposición “dotará de maior seguridade xurídica aos servizos que se realizan” desde Meteogalicia.

Deste xeito, o Goberno galego quere tramitar a mediados deste 2025 esta lei do clima, coa que abriría co Executivo unha desputa polas competencias meteorolóxicas e na que “está a traballar” coa intención de “tela lista de cara ao verán”.

 "Melloras e transparencia"

Doutra banda, Paula Uría explicou tamén que Meteogalicia estreou a mañá de onte ferramentas para “mellorar” a súa actividade e achegar “transparencia”; pór a disposición da cidadanía os “120 millóns de datos” que, desde o organismo público aseguraron, son recollidos cada ano desde o 2000, data na que iniciou a recompilación dixital.

As innovacións son dúas novas pestanas na parte superior da web: a de “Visor” e a de “Clima”, que se agregarán tamén á aplicación móbil, pero máis adiante, non hai aínda unha data confirmada.

Na mesma liña, a directora xeral comunicou que Meteogalicia e a Xunta están a introducir “avances con IA para mellorar as predicións meteorolóxicas”, e que isto “se verá reflectido nos contidos da páxina web”.

Os modelos habilitan aos meteorólogos a establecer os prognósticos climatolóxicos. A ferramenta de “Visor” permite observalos dunha forma máis áxil e moderna que a que anterior, que estaba formada por imaxes fixas.

Coa nova fórmula poden seleccionarse distintas variables, agrupadas en catro grupos (predición, observación, calidade do aire e modelos numéricos) que se mostran no mapa de forma interactiva a 96 hora vista e cos días dividos en tres franxas horarias: mañá, tarde e noite.