Fin de etapa da comisión do Entroido e Santo Cristo de Laza tras 10 anos

Os integrantes da actual comisión de festas do Entroido e Santo Cristo, as dúas festas máis senlleiras da vila de Laza, veñen de comunicar que se retiran do seu labor tras unha década organizando estes eventos.

Esta decisión tomouse a raíz dunha reunión coa veciñanza que tivo lugar recentemente, “aínda que non foi só ese o motivo”, e trala que a comisión pide “desculpas” polos erros que se puideran cometer nestes 10 anos, e que asumen “con humildade”. Ao mesmo tempo consideran unha “falta de respecto non permitir que a comisión fale nin se exprese libremente na reunión”.

Deste xeito, a escasos dous meses de celebración do Entroido lazao, e tralas “dificultades e trabas que fomos atopando ao longo deste tempo”, a comisión das festas queda “aberta a todas aquelas persoas que desexen asumir a organización, desexándolles moita sorte no seu labor”, expresaron os seus integrantes.