Laza reivindica con música tradicional a forza das mulleres

As asociacións culturais de Laza Silveiras do Támega e enLAZAdos volven cun novo evento musical o vindeiro 24 de maio, sábado, a segunda edición da súa “ruarada” (foliada na rúa). Baixo o nome “Ruarada na das guerras”, esta iniciativa é a continuación da “Ruarada na Aira” que tivo lugar o pasado febreiro dentro das III xornadas “Tempo de Entroido”.

Desta vez a “ruarada” emancípase e pasa a se converter nun evento independente que combina palestras, obradoiros, concertos, concursos e reivindicación da memoria, creación colectiva e forza das mulleres a través da música tradicional que mantén viva o rural.

Ás 18,00 horas terá lugar “Anacos de Dorothé”, un coloquio con Lucía Cedrón. Unha hora máis tarde haberá un obradoiro de culleres impartido por Isabel Cid, e posteriormente dous concertos, da man de Netas do Arnoia e d’Os Biruxes.

A velada na vila completarase cun sorteo de produtos locais e da comarca e máis unha foliada libre ao remate, para a que se convida a todo o mundo que leve o seu instrumento e ganas de bailar.