O Ponte Farruca contribuirá a reforestar Laza tralos lumes

As xa icónicas batas do festival Ponte Farruca de Laza volverán a lucirse con orgullo moi pronto. Tras verse na obriga de ter que pospór a súa cuarta edición, prevista para mediados do pasado agosto, por mor da ola de lumes que devastou a comarca, a organización do evento vén de confirmar o cartaz definitivo, encabezado polas Tanxugueiras en acústico, Alana e Unto Vello, e que finalmente terá lugar o 25 e o 26 de outubro.

O traballo da asociación cultural enLAZAdos ao longo destas semanas foi clave para poder manter en pé o maior número de actuacións e actividades deste festival, referente da inclusión LGTBI no rural.

Ao mesmo tempo, incorpora citas novas como “Reverdecer”, na que os participantes reforestarán zonas da contorna de Laza afectadas polos incendios e recibirán unha charla.

Obradoiros e tractorada

Se ben a programación final, ao pasar de tres a dous días, está por concretar, o festival terá feira de artesanía, xogos labregos, os Farruca Dates, cinema rural, obradoiros de baile, cantos de taberna e un clásico, a tractorada engalanada.

Ademais, tamén actuarán Señora DJ e Os Kokakolas. Nos vindeiros días abrirase o prazo de inscrición nas actividades.