“Preocupación” de Xuntos por Laza polo quiosco de Regueiro Seco

Xuntos por Laza-Interior Galego Vivo, vén de amosar a súa “preocupación e malestar” a conta da “falta de xestión e transparencia” arredor do quiosco-bar da área recreativa de Regueiro Seco en Laza, debido a que este “continúa pechado”.

A forza da oposición asegura que un mes despois do pleno do 9 de xullo, onde se asegurou que estaría operativo “ao final da semana”, non se puxo en marcha “ningún proceso público, nin se publicou resolución algunha”.

Isto prodúcese nun contexto “especialmente preocupante, en alerta amarela por altas temperaturas”, e Regueiro Seco é unha das “principais zonas de lecer ao aire libre do municipio”.

O alcalde, José Ramón Barreal, asegura que o Concello quería realizar “un contrato menor, pero os requisitos non interesaron a ninguén porque só poderían vender bebidas sen alcohol debido á normativa”. O plan agora pasa por “crear unhas novas instalacións o ano que vén”.