Unha aldea de Lugo organiza un festival para homenaxear o grupo 'Pink Floyd'

A aldea de Salcedo, no municipio lugués da Pobra do Brollón, celebrará neste sábado un festival para homenaxear a banda británica 'Pink Floyd' e o chamado 'rock progresivo', cun programa de actos que inclúe cinema, mesas redondas e actuacións musicais.

Esta iniciativa foi organizada pola asociación que agrupa os veciños da aldea de Salcedo, o cineclub 'A Calexa' de Monforte de Lemos e o grupo musical 'Vera Lynn', coa colaboración da Deputación Provincial de Lugo, que patrocina o festival, o Concello da Pobra do Brollón e o Movemento Lemavo.

Na presentación do festival, o presidente da asociación veciñal de Salcedo, Javier González, antigo membro do grupo galego 'Yellow Pixoliñas', subliñou que este tributo a 'Pink Floyd' busca 'facer da aldea un lugar máis cosmopolita, para demostrar que nas aldeas pequenas tamén se fan cousas orixinais, novas e multiculturais'.

Pola súa parte, o deputado de Economía do Coñecemento, Emprendedores e Innovación, José Ramón Val, aclarou que a institución provincial apoia a celebración deste festival porque é unha actividade que contribuirá a 'dinamizar o medio rural, facer máis vivas e acolledoras as nosas aldeas e fixar poboación, aproveitando a creatividade e riqueza cultural das súas xentes'.

O festival comezará ás cinco e media da tarde no centro multiusos da parroquia de Salcedo, cunha charla sobre 'A música popular no cinema', a cargo do presidente e o secretario do cineclub 'A Calexa', Carlos Cortiñas e Antonio Vidal, respectivamente.

Posteriormente, proxectarase a película 'The wall', do director Alan Parker, e David Díaz Dacal disertará sobre a 'Escea Canterbury', un movemento artístico xurdido en Inglaterra a finais da década dos 60 que se integra dentro do chamado 'rock progresivo'.

O ciclo de charlas será cerrado por outro exintegrante do grupo 'Yellow Pixoliñas', Alberto Camarero -Tico-, que falará sobre a vida e obra da banda de Cambridge, nunha conferencia titulada 'Pink Floyd, a revolución progresiva'.

O programa de actos finalizará coa presentación do grupo 'Vera Lynn', de Monforte de Lemos, nun espectáculo multimedia que combinará imaxes, texto e música cunha contundente 'posta en escena sobre versións de Pink Floyd', segundo explicaron os promotores do festival.