“Se chove, que chova”, gañador do voto popular no Festival de Xardíns

Tralo seu peche o pasado 31 de outubro, a XV edición do Festival Internacional de Xardíns de Allariz (FIXA) anuncia como gañador do voto popular ao xardín “Se chove, que chova”, deseñado por Isabel Gutiérrez García, Mónica Alonso Martínez-Laya e Lucía González Garrido, acadando o 22,4% dos votos despois de máis de cinco meses e medio.

A edición desenvolveuse baixo o lema “Cambio climático: unha oportunidade para o xardín”, e o gañador centrouse na xestión sostible da auga, combinando canalóns e pequenos bebedoiros, acompañados dun anel de vexetación autóctona, seleccionada tendo en conta a súa adaptación ao clima galego, ademais do seu valor estético e a súa contribución ao ecosistema.

O tema para a edición 2026 é “Os xardíns da liberdade”, e as inscricións rematan o 30 de novembro.