O grupo Os do Fuelle convidan a súa II Xuntanza en Maceda

O sonado grupo macedao “Os do Fuelle” celebra mañá a II Xuntanza “Amigos do Fuelle”, logo do éxito que tivo a primeira edición celebrada o pasado marzo. Juan “Tito” González, director da agrupación, explicou que a idea naceu “para desfrutar nós da música nun ambiente máis informal”, reunindo “aos nosos amigos e ao público que nos acompaña en tódolos concertos nunha cea”.

Na primeira cita, que congregou a preto de 150 amantes da música, Os do Fuelle convidaron á Escola de Música Tradicional de Trasmiras “da que somos moi amigos” e ao grupo Lume na Lareira, chegados dende A Estrada. “Foi tan ben e pasámolo tan ben, que logo desa experiencia piloto decidimos repetir”. A premisa sobre a que traballan é convidar a dous grupos amigos -máis eles- e pasar unha velada cantando, bailando e estreitando as relacións entre os asistentes. “Unha das cousas que máis desfruta a xente das escolas son as reunións e a convivencia tanto nas clases coma fóra delas”, apuntou Tito.

Esta segunda edición terá lugar mañá ás 21,00 horas no restaurante A Diligencia, e contará coa Escola Xuvenil de Acordeóns de Campelo -de Poio, Pontevedra- e os Amigos do Acordeón de Celanova.

As reservas para poder asistir ao encontro pódense facer directamente no restaurante e o prazo para inscribirse remata hoxe.