Manzaneda acolle o proxecto “Mulleres que Contan” co GDR

O Concello de Manzaneda acolleu a presentación oficial do proxecto de cooperación “Mulleres que Contan”, unha iniciativa na que participa activamente o Grupo de Desenvolvemento Rural (GDR) Sil-Bibei-Navea. Trátase dunha proposta impulsada por varios GDR galegos que ten como obxectivo poñer en valor as experiencias, saberes e coidados das mulleres do rural.

O acto de presentación foi a primeira toma de contacto coas mulleres do territorio. Durante o evento, que tivo lugar o pasado mércores, o actor e humorista Xosé Antonio Touriñán, xunto coa diretora do proxecto Hadriana Casla, achegaron unha perspectiva emotiva e inspiradora do proxecto.

“Mulleres que Contan” pretende conformar un grupo de mulleres que compartan sinérxias, vivencias e proximidade, a través dunha serie de obradoiros e actividades centradas na memoria e o coidado.

O foco estará posto na recollida de saberes relacionados cos coidados que tradicionalmente asumiron as mulleres do rural maiores de 65 anos que queiran compartir as súas vivencias e participar activamente no desenvolvemento da proposta: atención ás crianzas, aos pais e nais, así como ao seu propio autocoidado, un aspecto moitas veces invisibilizado.

Este proxecto está coordinado pola Asociación Deloa, e participan nel tamén o GDR Asociación Miño-Ulla, o GDR Ribeira Sacra-Courel e o Grupo de Desenvolvemento Rural Sil-Bibei-Navea. A Asociación Castelo Conta actúa como entidade colaboradora, achegando a súa experiencia previa no desenvolvemento deste tipo de iniciativas.

A posta en marcha de “Mulleres que Contan” supón un recoñecemento do papel fundamental das mulleres rurais, así como unha oportunidade para crear comunidade, reforzar lazos e preservar unha memoria colectiva que forma parte esencial do noso patrimonio inmaterial.