Mellora do vial que une Manzaneda con Soutelo

A Xunta de Galicia asinou un convenio de colaboración co Concello de Manzaneda para acometer obras de mellora no vial que conecta o núcleo de Soutelo coa parroquia de San Martiño. A intervención, enmarcada no Plan Hurbe, suporá un investimento total de máis de 180.000 euros. A conselleira de Vivenda e Planificación de Infraestruturas, María Martínez Allegue, e a directora xeral de Urbanismo, Encarnación Rivas, formalizaron o acordo co alcalde Amable Fernández Basalo.

As obras mellorarán o pavimento, beirarrúas e unha senda nun tramo de 560 metros, ademais da rede de pluviais e a creación de pequenas zonas verdes. Este vial, que conecta Manzaneda, Soutelo, San Martiño e Rozavales, é a principal comunicación entre estas localidades e a estrada cara á Pobra de Trives, sendo ademais moi transitada por visitantes da zona.

A Xunta financiará o 70 por cento do orzamento, 126.000 euros, e asumirá tanto a contratación como a execución das obras. O 30 por cento restante, arredor duns 54.000 euros, corresponde ao Concello de Manzaneda, e será cuberto, segundo sinalan desde o Consistorio, con achegas da Deputación de Ourense. O prazo previsto de execución é de catro meses.

Estas actuacións enmárcanse no Plan Hurbe, que busca apoiar ás entidades locais na mellora dos espazos urbanos e na accesibilidade, reforzando o desenvolvemento dos núcleos rurais.